على رأي أحمد حلمي في فيلم بلبل حيران، اللي فات ده كله حمادة و اللي جاي حماده تاني خالص. إحنا قبل كده كان كل كلامنا على مرحلة ما قبل الموافقة على العريس..لكن دلوقتي هنمشي مع بعض مشوار اﻷلف سؤال..دلوقتي جه العريس و عرفت العروسة هي عاوزة إيه بالضبط و هتختار إزاي..جميل..وافقت العروسة و أهلها مبدئيا إنهم يشوفوا العريس، قبل ما نتكلم خلينا نقسم مع بعض مراحل ما قبل الزواج إلى أربعة مراحل: الموافقة المبدئية، قرائة الفاتحة، الخطوبة، كتب الكتاب. و إن شاء الله هنتكلم عن كل مرحلة بالتفصيل لغاية ما نوصل للزواج و ما بعده. خلاص إتفقت والدة العريس مع والدة العروسة (أو لو فيه واسطة في النص بتقوم هي باﻹتفاقات دي) إنهم يتقابلوا، ناس كتير دلوقتي بتفضل تتاقبل أول مرة أو إتنين (و ساعات أكتر من كده) بره في مكان عام (يا إما في نادي أو cafe أو ما شابه ذلك من اﻷماكن)، و قد يكون السبب هو إنهم يتقابلوا في أرض محايدة فيكون الطرفين أكثر إسترخاء أو إن أهل البنت مش عايزين يدخلوا أي حد البيت و دي كلها أسباب تحترم طالما إن اﻷمهات حاضرين القاعدة و طبعا مطرتئين ودانهم عشان يسمعوا العريس و العروسة هيتكلموا في إيه و طريقة كلامهم عاملة إزاي و إلخ إلخ إلخ..و مشكلة بتواجه بنات و شباب كتير هي إنهم مش عارفين يتكلموا في إيه أول مرة، أنا نصيحتي إن أول مقابلة يكون الكلام عام و بسيط ﻷن ده بيعطي فرصة للطرفين إنهم يفكوا كتلة التوتر اللي جواهم. من الموضوعات اللطيف التحدث فيها في أول مقابلة هي: أنواع اﻷفلام المفضلة، إهتمامات أو هوايات (و لو إننا في زمننا ده مبقاش في حد ليه هوايات)، لو بتحبوا القراءة ممكن تتكلموا عن كتاب حلو قرأتوه (بس ميكنش مجلد ميكي ولا برضه يكون موسوعة البحث العلمي عن أنماط تزاوج النمل الفارسي في فصول السنة المختلفة..كلكم نظر طبعا!)، ممكن برضه موضوع لطيف خفيف تكونوا قرأتم عنه في الجرنال أو على اﻹنترنت أو سمعتوه في التلفزيون، أو ممكن حتى تتكلموا عن شغلكم (بس لو كنت أو كنتي من النوع اللي لما بيتكلم عن الشغل محدش بيعرف يسكته يبقى لازم تخلي بالك، أسوأ حاجة إن طرف واحد يحتكر الحوار و التاني يحس إنه فاتح التلفزيون و قاعد بيسمع و مش قادر حتى يغير القناة (هو صحيح أنا عملت كده في جوزي بس ده كان نصيبه و هو رضي بيه! و بعدين لازم تتعلموا من أخطاء الغير!!). و دلوقتي زي ما قلنا ممكن تتكلموا في إيه مهم برضه نقول إيه الموضوعات اللي يفضل ما تتفتحش في أول مقابلة، و هي: السياسة (إحنا بقينا في زمن كل واحد ليه رأي سياسي مستقل و فيه أحداث كتيرة بتحصل فمش عاوزين القاعدة تنتهي بإن بتوع اﻷمن بيقوللكم معلش يا ريت تتفضلوا من هنا بالذوق). للشباب: الكورة (أو أي رياضة إنت موهوم بيها) خلاص الكام سنة بتوع البنات اللي بقوا فجأة بيموتوا في الكورة و بيروحوا يحضروا ماتشات في اﻹستاد خلصوا و البنات رجعوا للشوبينج و الحمد لله. للبنات: آخر صيحات الموضة أو توم كروز طلق مراته ليه ولا مين إتجوز مين و فرقع مين، كل الكلام ده يتقال مع صاحباتك البنات، لو قلتيه للعريس يبقى كويس قوي لو كمل القاعدة و مخدش بعضه و مشي في نصها. و طبعا إياك تشتم أو تذم أو تشتكي (الكلام ده للعريس و العروسة) من مديرك أو زميلك في الشغل أو صاحبك، ﻹن من ناحية إنت مش قاعد مع صحابك على القهوة ولا إنتي قاعدة مع صاحباتك عند الكوافير و بتفضفضوا لبعض، و من ناحية تانية لو كنت مش قادر تمنع نفسك من الشكوة أو الشتيمة في حد في أول مقابلة مع عروسة (أو عريس) يبقى إنت في العادي عامل إزاي؟ أكيد بتشتكي على طول أو بتشتم في الناس على طول و دي مش صفة حلوة (و لو إنت أو إنتي فعلا كده يبقى حاولوا تتخلصوا من الصفة دي ﻷنها أكيد متعبة ليك أو ليكي أكتر من أي حد). و طبعا بديهي إني أقول مفيش كلام في ماديات ولا ترتيبات جواز ولا سؤال عن مرتبات و لا التفاصيل دي كلها، أول قاعدة الهدف منها هو مجرد إن نشوف في قبول نفسي ولا ﻷ، و مش مطلوب من أي من الطرفين إنهم يطلعوا من القاعدة دي يقولوا أه أنا موافق ياللا نقرأ الفاتحة، كل اللي مطلوب هو إن لو مفيش سبب ينفر أي طرف من التاني و في إستلطاف مبدئي يبقى نقول ممكن نشوف بعض تاني (و أنا حاطة خط تحت مبدئي ﻷن في ناس و معظمهم من البنات بيبقوا فاكرين إنهم لازم يطلعوا من أول قاعدة دايبين و ولهانين و يناموا حاضنين المخدة لغاية ما يتقابلوا تاني و الكلام اللطيف اﻷبيض و أسود ده). و كمان من اﻷخطاء اللي بعض الناس بتعملها هي إنها لما بتلاقي الطرف اﻵخر ليه رأي مختلف في موضوع ما يفضلوا ورا الشخص لغاية أما يفرفر تحت إيديهم و يغير رأيه، و أحيانا ده بيكون في موضوع مهم زي مثلا إن تكون العروسة مش عايزة تشتغل بعد الجواز و يكون العريس عايز عكس كده فيفضل يقنعها إن الشغل أحسن عشان توافق تشتغل و هي أصلا لسة موافقتش عليه هو شخصيا! أو مثلا إن يكون العريس مش عاجباه طريقة لبس العروسة فيحاول يقنعها تغير طريقة لبسها. لازم نبقى فاهمين إن محدش بيتغير عشان حد فمابالك بقى لو عشان حد لسة بتشوفه ﻷول مرة في حياتك. و نصيحة للبنات: لو لقيتي العريس قاعد ساكت و مبيفتحش كلام متحكميش عليه إنه دمه تقيل ولا مبيعرفش يفتح كلام، هو كمان ممكن يكون مكسوف أو مشدود أو مش عارف يبتدي كلام إزاي..عادي جدا، بتحصل في أحسن العائلات :-) بدل ما تقعدي ساكتة إنتي كمان، جربي إفتحي إنتي كلام على خفيف و ملكيش دعوة بالكلام اللي كان بيتقال زمان إن البنت لما تفتح هي الكلام تبقى شخصيتها قوية و البنت اللي شخصيتها قوية دي مش حاجة حلوة..ده كان زمان أيام ما كانت البنت مش بتخرج ولا بتشوف الشارع إلا مع باباها و مامتها (أو أخوها الكبير اللي بتقولله "أبيه"). و أخيرا و ليس آخرا، لو أي واحد فيكم (العريس أو العروسة) إتضايق من التاني في حاجة و أخد قرار إن الشخص ده لا يمكن ينفعه كزوج أو زوجة، يا ريت تكمل القاعدة على خير و متقلبش وشك ولا تطلعي موبايلك و تفتحي ال(facebook chat) و تقعدي تتكلمي مع صاحباتك، تعاملوا مع الموقف بدبلوماسية و حكمة و لما ترجعوا البيت إبقوا إعتذروا عن إنكم تكملوا. و ربنا يوفق الجميع.
موضوع رووووعة تسلمي ^_^
ReplyDelete